Mómæli við danska sendiráðið
Nokkrir M.E. og FM (síþreytu og vefjagigtar) sjúklingar hafa tekið sig saman um að mótmæla meðhöndluninni á M.E. sjúklingnum Karinu Hansen í Danmörku fyrir utan sendiráð Danmerkur, Hverfisgötu 29, í hádeginu næsta fimmtudag kl. 12:00 (stendur í um klukkustund) .
Okkur langar til að hvetja sem flesta til að koma þennan klukkutíma, því mál hennar er orðin sjö mánaða hryllingur. Karina, 23 ára kona, var tekin í nauðungarvistun og hefur lítil sem engin samskipti við fjölskyldu sína vegna þess að nokkrir læknar telja M.E. vera sálvefrænan sjúkdóm sem hún "spinnur upp" með ímyndunarafli sínu. Fyrir aðeins átta árum lést ung kona Sophia Mirza eftir samskonar nauðungarvistun í Bretlandi af sömu orsökum. Við getum ekki staðið hjá. Um 15 manns hafa nú tilkynnt þátttöku og við vonumst til að sjá fleiri.
Þetta er ekki aðeins mál heilbrigðiskerfisins í Danmörku heldur hefur það áhrif á réttindastöðu sjúklinga víðar ef það er látið átölulaust. Mál hennar er líka mjög lýsandi fyrir þá fordóma sem við M.E. og vefjagigtarsjúklingar þurfum að glíma við. Umræða er komin upp á hópnum. Verið í sambandi á hópnum ef um spurningar er að ræða.
